ஓய்வெடுக்கட்டும் உந்தன் காதலி

ஓய்வில்லா காலமே

சிறிது நேரம் ஓய்வெடு

ஓய்வில்லா தேடலில் இருக்கும்

அவள் ஓய்வெடுக்க வேண்டும்!

 

காலையில் எழுந்ததும்

அவள் உன் வேகத்தோடு

தன்னை இணைத்துக் கொள்வாள்!

அதுவரை நீயும் ஓய்வெடு!

அவள் ஓய்வெடுக்க வேண்டும்!

 

எந்த நாளும் நான் கேட்டதில்லை

இந்த நாளில் கேட்கிறேன்..

அவள் மறுபடியும் மண்ணுக்கு

கருவறை செல்லாமல் பிறந்து வருவாள்!

ஆகையால்..

அதுவரை நீயும் ஓய்வெடு!

அவள் ஓய்வெடுக்க வேண்டும்!

 

அவள் யாரென்று கேட்காதே

அவளை நீ அறிவாய்..

உன்னை அவள் அறிவாள்!

இடையில் நான் என்ன சொல்ல?

அவள் உந்தன் காதலி!

காலமே.. அதை அறியாதவனாய்

என்னிடம் கேட்காதே!

அவள் ஓய்வெடுக்க வேண்டும்!

அதுவரை நீயும் ஓய்வெடு!

Advertisements